Majalisar Shari’ar Musulunci ta bukaci Shugaba Tinubu ya sake nazarin nadin Farfesa Joash Amupitan a matsayin shugaban INEC Ta nuna damuwa kan zargin Amupitan da rubuta takarda da ta saba wa Musulmai a baya wanda hakan rashin adalci ne Majalisar ta yi magana kan rahoton cewa Farfesan ya yi rubutu mai cike da wariya da suka kan Jihadin Shehu Usman Ɗan Fodiyo
Majalisar Shari’ar Musulunci (SCSN) ta roƙi Shugaba Bola Tinubu da ya sake nazarin nadin Farfesa Joash Ojo Amupitan a matsayin shugaban hukumar INEC. Majalisar ta ce akwai rahotanni daga wata gidan jarida da ke zargin Farfesan da rubuta wata takarda a 2020 da ke nuna wariya da ƙiyayya ga Musulmi.
An bukaci Tinubu ya kori shugaban INEC
A wata sanarwa da sakataren majalisar, Nafiu Baba-Ahmad, ya sanya hannu da Daily Trust ta gano, an bayyana damuwa kan irin kalaman da ake zargin Farfesan ya yi a rubutun
Majalisar ta bayyana cewa rubutun ya ƙunshi kalamai “masu tada hankali da rashin adalci” da suka shafi rikice-rikicen Arewa da jihadin Shehu Ɗan Fodiyo. Ta ce takardar ta yi ƙoƙarin nuna rikice-rikicen Arewa a matsayin “kisan Kiristoci,” tana danganta su da jihadin Shehu Usman Ɗan Fodiyo.
Ta ce: "Idan har Farfesa Amupitan ya wallafa wannan rubutu, tabbas abin da ke ciki hatsari ne ga hadin kai, zaman lafiya da ci gaba kasar Najeriya. “Jihadin Shehu Usman ba ya da alaƙa da ƙiyayya, amma yunƙurin gyaran ɗabi’a da adalci.” - Cewar majalisar Ta kuma ce ra’ayoyin da aka danganta wa Farfesan sun nuna rashin fahimtar cewa Musulmai ma suna cikin waɗanda ke fama da hare-haren ta’addanci.
Majalisar shari'ar Musulunci ta magantu kan tsaro Majalisar ta jaddada cewa mafi yawancin waɗanda suka rasa rayukansu a Borno, Zamfara, Katsina, da Yobe Musulmai ne da suka fi shan wahala. Don haka, a cewarta, ba daidai ba ne a yi ƙoƙarin juya wannan bala’i zuwa labarin wariyar addini ɗaya kawai.
Majalisar ta tambayi yadda mutum da ake zargin yana da irin wannan ra’ayi na kiyayya ya samu amincewa don jagorantar hukumar zaɓe mai muhimmanci. Ta bayyana mamaki cewa “mutum mai irin wannan son zuciya” ya wuce binciken tsaro har aka amince da shi don rike ofishin INEC. SCSN ta bukaci sake duba nadin Farfesan, tana mai cewa jagorantar hukumar zaɓe na buƙatar “mutunci, adalci, da rashin nuna bambanci.” Ta gargadi cewa nuna son kai a kan kujerar INEC zai iya jefa amincewa da zabubbukan gaba cikin haɗari, cewar Sahara Reporters. Majalisar Shari'a ta ji dadin rufe makarantu A baya, kun ji cewa Majalisar shari'ar Musulunci ta Najeriya ta goyi bayan rufe makarantu a Ramadan, ta ce hakan zai taimaka wa dalibai. Majalisar ta bukaci jihohin Zamfara, Sokoto da Jigawa su ɗauki wannan mataki, tana mai cewa wannan shawara ce don amfanin addini da kiwon lafiya.
Ta ce gwamnatocin jihohi na da cikakken iko kan jadawalin makarantu, tana sukar masu adawa da matakin.